Арчын тууныҥ аржанын
Амзап ичип алалык.
Арчын јытту Алтайга
Мӱргӱп алып јӱрелик.
Суна баскан Алтайым,
Сузуп ичкен талайым!
Аш-курсагымнаҥ амзагар
Алкыш-быйанаар јетиреер,
Јоболтомды јоголтор,
Сын-аркамды сергидер,
Санаа-укаамды јарыдар.
Баш болзын,байлу аржаным!
Бир алкыжаар јетиреер!
Кайракан баш,аржаным!
Эне јердиҥ эмчегинеҥ
Эбирип келдеер,аржаным!
Ак сана болуп Алтайга
Алкыш экелдеер,кутугым!
Јоболтомды јоголтып салзаар,
Сынымды сергедип берзеер!
Баш болзын, байлу, аржаным!
Тату, ару аржаным!
Кирге-торго бастырба!
Бир болужыҥды јетир!
Алкыш быйан сурайдым!
Айры бутка алтатпа!
Ак айастаҥ ыраба!
Баш болзын, аржан суу!
Ору-јоболым јазылзын!
Баш болзын,эмдӱ суу!
Бир алкыжыҥ меге јетсин!
Ак айаста ару јат!
Кӧк айаста кӧрӱ јат!…
Арчын агаш бӱриндий
Онбос болзоос кайдадыс.
Аржан-кутук суузындый
Артабас болзоос кайдадыс.
Мӧш агаштыҥ бӱриндий
Онбосболзооскайдадыс.
Мӧнӱн-алтын суузындый
Мӧнкӱ болзоос кайдадыс.
